باختصار: من لوحة منصّتي ← الشكل والصفحات تقدر تغيّر شكل أكاديميتك وألوانها وخطها وأقسامها. كل الأشكال بتتعرض بكلامك وصورتك وكورساتك انت، وتغيير الشكل مش بيمسح ولا حرف. وأي تعديل بيتحفظ لوحده، بس طلابك مش بيشوفوه غير لما تدوس «انشر».
تجرّب شكل تاني
- ادخل الشكل والصفحات ← الشكل، ودوس «جرّب شكل تاني».
- هتلاقي كل الأشكال، وكل واحد بيوريك أكاديميتك انت بيه. فوق فيه أنواع تقدر تختار منها: «مرِح» و«هادي» و«ثانوية عامة» و«للأطفال» وغيرهم، واللي عليه «مناسب لمادتك» اخترناه على حسب اللي بتدرّسه.
- دوس «جرّبه» عشان تشوفه على الشاشة كلها بكلامك. عاجبك؟ دوس «استخدم ده». مش عاجبك؟ دوس «ارجع للأشكال».
«استخدم ده» بيغيّر النسخة اللي بتعدّل فيها بس. طلابك لسه شايفين الشكل القديم لحد ما تدوس «انشر».
لو كنت مغيّر الألوان أو الخط قبل كده
هنسألك: «تاخد ألوان الشكل الجديد كمان؟». لو قلت «لأ، سيب ألواني» هنسيب ألوانك وخطك زي ما هم، ولو قلت «أيوه، خد ألوانه» هتاخد بتوع الشكل الجديد. لو عمرك ما غيّرتهم، الألوان والخط بيمشوا مع الشكل لوحدهم.
غيّرت ورجعت في كلامك؟
بعد ما تغيّر الشكل هيظهر شريط تحت: «غيّرت الشكل لـ … مش عاجبك؟» دوس «رجّع اللي كان» وكل حاجة ترجع زي ما كانت بضغطة واحدة.
ليه فيه حاجة اختفت بعد ما غيّرت الشكل؟
مفيش حاجة بتتمسح. بعض الأشكال مش بتعرض كل حاجة (مثلًا شكل الواجهة «صورة عريضة» بيعرض صورة الغلاف بدل صورتك). هتلاقي تحت القسم: «محفوظ، بس مش ظاهر في الشكل ده»، والكلام أو الصورة دي بترجع تظهر لو رجعت للشكل القديم.
الألوان والخط والوضع الليلي
- الألوان: 8 ألوان جاهزة، كل واحد عليه اسمه: فيروزي، ودفتر، وبحر، وورد، ورمل، وواضح، وسبّورة، وليل. دوس على أي لون وشوف أكاديميتك اتغيّرت إزاي في المعاينة. كل الألوان متظبّطة إن الكلام يتقرا كويس عليها.
- الخط: 4 اختيارات (مرِح، وعملي، وكلاسيكي، ورسمي وقرآن)، وكل كارت مكتوب بالخط نفسه عشان تشوفه قبل ما تختار.
- الوضع الليلي: لو سايب «الزوار يقدروا يشغّلوا الوضع الليلي» شغّال، هيبقى فيه زرار صغير فوق في أكاديميتك يقلبها غامقة للي بيذاكر بالليل. لونين «سبّورة» و«ليل» غامقين أصلًا، فمعاهم مفيش الزرار ده.
اللوجو والصور
من الشكل ← الصور:
- صورتك: بتظهر في الواجهة و«عني». لو مفيش، هنحط الحروف الأولى من اسمك.
- اللوجو: بيظهر فوق جنب اسم أكاديميتك وعلى أيقونتها في موبايل الطالب. مش عندك لوجو؟ دوس «اعملّي واحد» واختار اللي عاجبك.
- صورة الغلاف: بتظهر لما الواجهة يبقى شكلها «صورة عريضة».
لو الصورة ما اترفعتش، خد لها سكرين شوت وارفع السكرين شوت، وهتشتغل على طول.
الأقسام: تظهر، تتخبى، تترتب، تتمسح
من الشكل والصفحات ← الصفحات هتلاقي كارت لكل قسم في الصفحة (الواجهة، وعني، وكورساتي، وآراء الطلاب…). في كل كارت:
- «يظهر»: اقفله لو عايز تخفي القسم شوية من غير ما تمسحه. كلامه بيفضل محفوظ.
- «لفوق» و«لتحت»: يغيّروا ترتيب القسم في الصفحة.
- «عدّل»: يفتح خانات القسم ده بس.
- «امسح»: بيمسح القسم على طول، وتحت هيظهر «رجّعه» 10 ثواني. فاتوا؟ لسه تقدر ترجّعه من «اتمسح من الصفحة دي» لحد ما تنشر.
- «+ ضيف قسم»: بيوريك الأقسام اللي ينفع تتضاف في الصفحة دي بس. الصفحة تاخد لحد 12 قسم، عشان تفضل خفيفة على موبايلات طلابك.
التعديل من المعاينة على طول
دوس على أي جزء في المعاينة، وهيفتح تعديله على طول. على الموبايل المعاينة بتاخد الشاشة كلها، والدوس على أي قسم بيفتح لوحة من تحت فيها خانات القسم ده بس، ودوس «تمام» عشان ترجع للمعاينة. ولو عايز تشوف كل الأقسام كروت، اختار «رتّب الأقسام» فوق.
الكلام الطويل
خانات الكلام الطويل (زي «عني») فوقها 3 زراير بس: عريض، وقايمة، ولينك. ده كل اللي محتاجه، والكلام بيطلع مترتّب على الموبايل والكمبيوتر.
تبدّل الكلام الجاهز بكلامك
أكاديميتك جت مليانة كلام عشان ما تبدأش من ورقة فاضية. وفيه نوعين:
- كلام جاهز باسمك: زي جملة الواجهة، و«عني» من النبذة اللي كتبتها، و«أسئلة بتتسأل كتير». ده كلام حقيقي عنك، فبيتنشر عادي، وتقدر تعدّله في أي وقت. إجابات الأسئلة اللي جنبها «بتتحدّث لوحدها» بتتغيّر مع إعداداتك (طرق الدفع وعدد الأجهزة مثلًا)، ولو عدّلتها بإيدك هتفضل زي ما كتبتها.
- مثال: زي آراء طلاب بأسماء متخيّلة، أو أرقام. عليه شريط مقلّم «مثال، مش هيظهر لطلابك»، ومش بيوصل لأكاديميتك الحقيقية أبدًا. القسم ده بيفضل مستخبي عن طلابك لحد ما تحط حاجة حقيقية.
عشان تبدّل المثال: دوس «حط الحقيقي» واكتب كلامك مكانه. أول ما تعدّل أي حاجة فيه، الشريط بيختفي، وبيظهر لطلابك بعد ما تنشر. وعايز تبدأ من الأول؟ دوس «امسح الأمثلة» وضيف أول واحد حقيقي.
في «آراء الطلاب» اكتب كلام طلاب حقيقيين بس، وبالاسم الأول بس لو حابب. وفي «أرقام» حط أرقام حقيقية تقدر تثبتها.
«انشر»
كل تعديل بيتحفظ لوحده. لما يبقى عندك تعديلات لسه طلابك ما شافوهاش، هيظهر شريط تحت: «عندك تعديلات لسه ما اتنشرتش. طلابك لسه شايفين النسخة القديمة.» دوس «انشر»، وطلابك هيشوفوا التعديلات خلال دقيقتين بالكتير.
حاجتين بيشتغلوا على طول من غير «انشر»: تغيير رابط أكاديميتك (من «الهوية»)، والإعدادات المتقدمة (زي التسجيل وعدد الأجهزة).
حاجات مش بتتغيّر
- السطر اللي في آخر كل صفحة «بتشتغل بـ حصّتي» ثابت في كل الأكاديميات ومينفعش يتشال.
- مفيش مكان تكتب فيه كود في أكاديميتك، وده بيحمي طلابك وبيخلّي أكاديميتك سريعة على الموبايل.
محتاج مساعدة؟
كلّمنا على واتساب من زرار «محتاج مساعدة؟» في أي شاشة، وقولنا انت فين، وهنرد عليك بسرعة.