تقدر تدّي حصتك من المتصفح على طول، من غير ما تنزّل تطبيق. كل أدوات الحصة موجودة: الصوت والصورة، مشاركة الشاشة، السبورة، السؤال السريع، رفع الإيد، الدردشة، قفل الباب، وكاميرا الموبايل.
ابدأ الحصة
- ادخل hessety.com بحسابك، وافتح حسابي.
- في كارت الفصل اضغط ابدأ الحصة.
- هتفتح صفحة «جهّز الكاميرا والمايك». أول مرة المتصفح هيسألك عن إذن الكاميرا والمايك: اضغط «سماح». بعدها اختار الكاميرا والمايك، واتأكد إن صورتك ظاهرة وإن مؤشر الصوت بيتحرك وإنت بتتكلم.
- اضغط ابدأ الحصة. الطلاب اللي فاتحين روابطهم بيدخلوا لوحدهم، واللي معاه التطبيق على أندرويد بيوصله إشعار.
الطلاب مش بيعرفوا إن الحصة بدأت غير لما تضغط ابدأ الحصة في الخطوة الأخيرة، فخد وقتك في تجهيز الكاميرا والمايك.
في صفحة التجهيز هتلاقي اسمك وإيميلك. لو مش بتوعك، ما تبدأش الحصة: اخرج من الحساب ده وادخل بحسابك.
أي متصفح أستخدم؟
| الجهاز | المتصفح | مشاركة الشاشة |
|---|---|---|
| كمبيوتر أو لابتوب | كروم أو إيدج (الأحسن)، أو فايرفوكس أو سفاري بآخر تحديث | أيوه |
| موبايل أندرويد | كروم | لأ |
| آيفون أو آيباد | سفاري | لأ |
- على الموبايل تقدر تشرح من المتصفح، بس من غير مشاركة الشاشة، وسيب الصفحة مفتوحة قدامك طول الحصة. لو بتشرح من موبايل أندرويد على طول، تطبيق حصّتي أريح.
- لو فتحت الصفحة من جوّه واتساب أو فيسبوك، افتحها في كروم أو سفاري. المتصفح اللي جوّه التطبيقات دي مش بيشغّل الكاميرا والمايك كويس.
جوّه الحصة
الأزرار تحت في الصفحة:
| الزرار | بيعمل إيه |
|---|---|
| مايك وكاميرا | بيفتحوا صوتك وصورتك ويقفلوهم. |
| شاشتك | بيعرض تبويب أو نافذة أو شاشتك كلها للطلاب. على الكمبيوتر بس. |
| السبورة | اكتب وارسم قدام طلابك بالماوس أو القلم أو صباعك. |
| سؤال سريع | اسأل «فهمت؟» أو سؤال اختيارات، وشوف الإجابات في ثواني. |
| الطلاب | مين حاضر ومين رافع إيده. منها تسمح لطالب يتكلم أو تطلّعه من الحصة. |
| المزيد | قفل الباب، كاميرا الموبايل، وتغيير المايك أو الكاميرا. |
| إنهاء | بيقفل الحصة للكل، أو تخرج إنت بس والحصة تفضل شغّالة. |
الدردشة في اللوحة اللي على الجنب. على الموبايل الأزرار أقل، والباقي تحت المزيد.
مشاركة الشاشة
- اضغط شاشتك.
- المتصفح هيسألك تعرض إيه: تبويب (زي ملف PDF أو موقع مفتوح)، أو نافذة (زي بوربوينت)، أو الشاشة كلها.
- اختار واضغط «مشاركة». الطلاب بيشوفوا اللي اخترته على طول.
علشان توقّف العرض، اضغط شاشتك تاني، أو زرار «إيقاف المشاركة» اللي المتصفح بيظهره.
على ماك، أول مرة لازم تسمح للمتصفح بتسجيل الشاشة: إعدادات النظام ← الخصوصية والأمان ← تسجيل الشاشة، وبعدين اقفل المتصفح وافتحه تاني.
لو قفلت الصفحة
الحصة مش بتقفل لو قفلت الصفحة بالغلط أو النت فصل، ووقتها بيفضل يتحسب. ارجع لـحسابي، هتلاقي كارت الفصل مكتوب عليه «مباشر» وجنبه:
- ارجع للحصة: بترجّعك لنفس الحصة، والطلاب بيفضلوا فيها.
- أنهِ الحصة: بتقفلها للكل من غير ما تدخلها.
الحصة مفتوحة على جهاز تاني
حصة واحدة بس تقدر تكون شغّالة على حسابك، ومن جهاز واحد. لو فتحتها في المتصفح وهي شغّالة على التطبيق أو على صفحة تانية، هنسألك الأول. لو كمّلت، الحصة بتتنقل للجهاز ده وبتقفل عند التاني، والطلاب بيفضلوا في الحصة.
ولو عندك حصة شغّالة في فصل تاني، الصفحة هتخيّرك: تروح للحصة دي، أو تنهيها.
كاميرا الموبايل
تقدر تستخدم موبايل أندرويد ككاميرا تانية للكشكول أو السبورة: من المزيد اختار كاميرا الموبايل، وهيظهر كود من 6 أرقام. الخطوات كاملة في الموبايل ككاميرا تانية.