الكورسات وأكواد التفعيل

الكورس هو اللي طلابك بيشتركوا فيه: أقسام جواها دروس (فيديو محمي، أو يوتيوب، أو ملف، أو درس مكتوب، أو حصة لايف). بتعمله من لوحة منصّتي ← الكورسات ← + كورس جديد، من الموبايل أو الكمبيوتر.

كورس جديد في شاشتين

1. «اسم الكورس إيه؟»

اكتب اسم يعرّف الطالب هيذاكر إيه بالظبط، زي: فيزياء 3 ثانوي - الترم الأول. وإحنا بنعمل للكورس صورة جاهزة بألوان أكاديميتك واسمه عليها، وتقدر تغيّرها بعدين.

2. «الطالب هيدخله إزاي؟»

اختار واحدة:

مدة الاشتراك: جاهزة على «على طول». لو عايز تغيّرها دوس غيّر المدة:

• على طول: الكورس بيفضل مع الطالب على طول.
• شهر ويتجدد: الطالب بيدفع كل شهر. لو ما جدّدش، الكورس بيقفل عنده لحد ما يجدّد. (ده «الاشتراك الشهري».)
• عدد أيام: زي 120 يوم للترم، من يوم ما الطالب يشترك.
• لحد تاريخ: الكورس مفتوح لكل الطلاب لحد يوم معيّن، زي آخر يوم في الترم.

مش متأكد من السعر؟ دوس هقرر بعدين: الكورس بيتعمل مسودة، وهنسألك عن السعر قبل ما تنشره. وكل حاجة هنا تتغيّر بعدين من السعر والمدة جوه الكورس.

محرر الكورس

بعد ما تدوس اعمل الكورس هتلاقي قسم جاهز اسمه الأسبوع الأول، وجواه مساحة كبيرة: «اسحب أول فيديو هنا، أو اختاره من جهازك». وعلى الموبايل: ارفع أول فيديو من موبايلك.

• الأقسام: دوس على القلم جنب اسم القسم وغيّره، زي «الفصل الأول: الحركة». + قسم جديد بيضيف «الأسبوع التاني» وهكذا.
• الدروس: دوس + درس واختار النوع (تحت). وترتّب الدروس والأقسام من قايمة النقط التلاتة جنب كل واحد: طلّعه لفوق · نزّله لتحت · انقله لقسم تاني.
• عن الكورس: صورة الكورس، ووصف قصير كتبناهولك من الاسم، عدّله زي ما تحب.
• كل حاجة بتتحفظ لوحدها. ولو الكورس منشور، أي تعديل بيوصل لطلابك على طول.

أنواع الدروس

درس يوتيوب

• الصق أي لينك يوتيوب زي ما هو: من زرار "مشاركة" في تطبيق يوتيوب، أو لينك youtu.be، أو Shorts، أو لينك فيه وقت أو قايمة تشغيل. هنعرضلك صورة الفيديو واسمه عشان تتأكد إنه هو.
• خلّي الفيديو "غير مدرج" على يوتيوب عشان ما يظهرش في البحث.
• أول مرة تضيف يوتيوب هنفكّرك مرة واحدة إن فيديوهات يوتيوب مش عليها حماية حصّتي (لا اسم الطالب ولا البصمة الخفية). لو الدرس بفلوس، الأحسن ترفعه فيديو محمي.

الملفات والمذكرات

الملفات بتتنزّل عند الطالب، فممكن تتنشر. لو عايز تحميها، اكتب اسمك أو لوجو أكاديميتك عليها. الأنواع: PDF وWord وPowerPoint وExcel وصور وملفات مضغوطة.

درس مجاني للمعاينة

في كل درس مفتاح درس مجاني للمعاينة: الطالب يقدر يشوفه قبل ما يشترك. حلو تفتح أول درس عشان الطالب يجرّب شرحك.

الدروس تفتح بمواعيد

من إعدادات متقدمة في آخر الكورس، شغّل الدروس تفتح بمواعيد، واختار لكل قسم اليوم والساعة اللي يفتح فيها، بتوقيت القاهرة. القسم اللي ميعاده لسه ما جاش بيبان للطالب بس مقفول، ومكتوب عليه بيفتح إمتى.

كارت «إيه اللي بيحمي فيديوهاتك؟»

في محرر الكورس هتلاقي كارت بيقولك الحماية اللي على الفيديوهات المحمية، بصراحة: الفيديو متقفل لطلابك المشتركين بس، ومفيش زرار تحميل، واسم الطالب ورقمه بيظهروا خفيف على الفيديو، وفيه بصمة خفية في كل نسخة. ومفيش موقع في الدنيا يقدر يمنع تصوير الشاشة 100%؛ اللي بنعمله إن اللي يسرّب يتعرف. التفاصيل في الفيديوهات المحمية.

شوف كطالب، وانشر الكورس

• شوف كطالب بيفتح الكورس زي ما طالب مشترك هيشوفه. محدش غيرك شايف الصفحة دي.
• انشر الكورس بيخليه يظهر في أكاديميتك وطلابك يقدروا يشتركوا. محتاج درس واحد على الأقل، وسعر لو الكورس بفلوس.
• فيه فيديو لسه بيتجهز؟ مش بنمنعك تنشر. هنسألك: «تنشر دلوقتي والدرس ده يستخبى لحد ما يجهز، ولا تستنى؟». لو نشرت، الدرس بيظهر لطلابك لوحده أول ما يجهز.
• أكاديميتك لسه ما اتنشرتش؟ الكورس هيتنشر لطلابك أول ما أكاديميتك تتنشر، وكل حاجة محفوظة.
• بعد النشر دوس ابعته على واتساب، وهيتفتحلك واتساب برسالة جاهزة فيها رابط الكورس.

إخفاء الكورس أو مسحه

من قايمة النقط التلاتة جنب الكورس في الكورسات:

• اخفيه من الأكاديمية: الكورس مش بيظهر لطلاب جداد، والمشتركين يكمّلوا عادي. وترجّعه بـ رجّعه للأكاديمية.
• رجّعه مسودة (من جوه الكورس): محدش جديد يقدر يشترك لحد ما تنشره تاني.
• امسح الكورس: بيتمسح بس لو مفيهوش مشتركين، عشان محدش يضيع عليه كورس دفع فيه. لو فيه مشتركين، اخفيه بدل ما تمسحه.

أكواد التفعيل: بيع الكورس في السنتر أو المكتبة

الكود بيفتح الكورس لطالب واحد، مرة واحدة. بتطبعه كروت وتبيعه في السنتر أو المكتبة، وفلوس الأكواد بتاعتك انت، وبرّه حصّتي خالص.

تعمل الأكواد إزاي

1. من لوحة منصّتي ← كل الأدوات ← أكواد التفعيل ← + دفعة أكواد جديدة.
2. اختار الكورس، واكتب عدد الأكواد (من 1 لـ 500 في الدفعة؛ لو محتاج أكتر، اعمل كذا دفعة).
3. سمّي الدفعة عشان تلاقيها بعدين، زي سنتر الهرم - نوفمبر.
4. الكود يفتح الكورس لمدة: زي مدة الكورس، أو عدد أيام، أو على طول.
5. آخر ميعاد لاستخدام الكود: اختياري. سيبه فاضي لو مفتوح.
6. دوس اعمل الأكواد.

بعدها:

• نزّل الأكواد (Excel): ملف فيه كل الأكواد وحالة كل واحد.
• اطبع كروت: 10 كروت في كل صفحة A4، اطبعها وقصّها على الخط المتقطّع. على كل كارت الكود وخطوات استخدامه.
• في القايمة هتشوف كل دفعة: «اتستخدم 37 من 100»، ومين استخدم كل كود وإمتى.
• وقّف اللي ما اتستخدمش: لو كروت ضاعت أو الدفعة خلصت، الأكواد اللي لسه ما اتستخدمتش بتقف، واللي اتستخدمت بتفضل شغالة لأصحابها.

الطالب بيستخدم الكود إزاي

الطالب بيفتح رابط أكاديميتك، ويعمل حسابه، ويدخل كورساتي ← معاك كود تفعيل؟، ويكتب الكود. الكورس بيتفتحله على طول. الكود بالحروف الإنجليزي، وأي غلطة صغيرة في الكتابة (زي حرف صغير أو مسافة) بنصلّحها لوحدنا.

محتاج مساعدة؟ كلّمنا على واتساب من زرار محتاج مساعدة؟ في لوحة منصّتي.