رفعت صورة التحويل؟ كده الكورة في ملعبنا. ده اللي بيحصل بعدها، وإزاي تتابعه.
المراجعة بتاخد قد إيه؟
عادةً خلال ساعات. فريق حصّتي بيتأكد إن المبلغ وصل فعلًا على الرقم، وبعدها بيفعّل اشتراكك. مش محتاج تعمل أي حاجة في الوقت ده.
وإنت مستني، تقدر تجهّز فصولك وتضيف طلابك وتبعتلهم روابطهم عادي.
تابع حالة الدفع
من الموقع
افتح حسابي. طول ما الصورة بتتراجع، هتلاقي فوق «بنراجع صورة التحويل».
وفي كارت اشتراكك على الجنب، اضغط مدفوعاتي علشان تشوف كل دفعة: المبلغ، والباقة، والمدة، والطريقة، والتاريخ، وحالتها.
من التطبيق
افتح حسابي، واضغط «اختار باقة» أو «جدّد أو غيّر الباقة» تحت اسمك علشان تفتح باقتي. هتلاقي «بنراجع صورة التحويل»، وتحت خالص مدفوعاتي.
معنى كل حالة
| الحالة | معناها | تعمل إيه |
|---|---|---|
| بانتظار الدفع | فتحت صفحة الدفع، بس لسه ما رفعتش صورة التحويل. | لو حوّلت، اضغط «ارفع صورة التحويل» وارفعها. |
| قيد المراجعة | الصورة وصلتنا وبنراجعها. | ولا حاجة، استنى الإشعار. |
| تم الدفع | اتأكدنا، واشتراكك اتفعّل. | يلا على حصصك. |
| مرفوض | مقدرناش نأكد التحويل. السبب مكتوب تحتها. | اقرا السبب وارفع الصورة الصح. |
| لم يكتمل | صفحة الدفع اتقفلت من غير صورة، بعد 7 أيام أو لأنك فتحت دفعات أحدث. | لو لسه عايز تدفع، ابدأ دفعة جديدة. |
لما الدفع يتأكد
- بيوصلك إشعار وإيميل «تم تأكيد دفعك»، وفيه المبلغ واسم الباقة.
- اشتراكك بيشتغل على طول، وتقدر تبدأ حصصك.
- لو جددت نفس الباقة، المدة الجديدة بتتضاف بعد تاريخ انتهاء اشتراكك الحالي.
- لو اخترت باقة تانية، بتبدأ من يوم التفعيل. شوف التجديد وانتهاء الاشتراك.
لو الصورة اترفضت
متقلقش، دي بتحصل. هيوصلك إشعار وإيميل «لم نستطع تأكيد التحويل» وفيه السبب، زي «لم يصل تحويل بهذا المبلغ على الرقم.»
- افتح حسابي على الموقع. هتلاقي فوق «مقدرناش نأكد التحويل» والسبب تحته.
- اضغط «ارفع صورة التحويل».
- الصفحة هتقولك «مقدرناش نأكد الصورة اللي فاتت» والسبب. ارفع الصورة الصح واضغط «أرسل للمراجعة».
ومن التطبيق: افتح باقتي، هتلاقي «مقدرناش نأكد التحويل» وزرار «ارفع صورة التحويل».
لو السبب إن المبلغ ناقص أو التحويل ما وصلش فعلًا، الصورة لوحدها مش هتحل المشكلة. ابعت لنا من الرسائل ← فريق حصّتي ونشوفها مع بعض. التحويل المرفوض أو الناقص بيرجع لنفس الرقم اللي اتحوّل منه بعد ما نتأكد.
أسئلة سريعة
ينفع أبدأ دفعة تانية وأنا مستني المراجعة؟ لأ. هتظهر لك «عندك تحويل بنراجعه دلوقتي. استنى نتيجة المراجعة قبل ما تبدأ دفعة جديدة.» استنى النتيجة الأول.
ينفع أرفع نفس الصورة لدفعة تانية؟ لأ. كل دفعة ليها تحويلها وصورتها. لو جربت، هتظهر لك «صورة التحويل دي اترفعت قبل كده لدفعة تانية».
بعت صورة غلط بالغلط، أعمل إيه؟ ابعت لنا الصورة الصح من الرسائل ← فريق حصّتي، وقول لنا إنها لنفس الدفعة.
التجربة خلصت وأنا لسه مستني، أعمل حصتي إزاي؟ الحصص بتشتغل أول ما الاشتراك يتفعّل. لو عندك حصة قريبة، ابعت لنا من فريق حصّتي وقولنا.
الخطوة الجاية
عدّى وقت طويل ومفيش رد؟ شوف دفعت والاشتراك لسه ما اتفعّلش.